Onwa Dezemba!

E don tey wey I know say this December wear koi-koi come

26th we dey so, yet we never see Santa for our area

Na him this evening youths for area come Waka round announce say we go contribute #300 each house to hire Father Christmas at least say them dey suspect as Santa be foreign guy bandits fit don kidnap am mid-flight to our location

Chineke!

Before the information go digest I see Mama Elizabeth wey we dey share fence with ghana-must go

No be like say I dey look oh

I dey cook for kitchen when I begin hear

'You must buy that fawo for Christmas if not hehehe, two fawo, crate of malt and fresh tomatoe.

See my friend Julie, na goat her husband buy'

Small time I say make I come pour small water outside cos I no dey hear the voice well we'll again

Na so I jam eyes with Mama Elizabeth with bag for head

Husband dey shout 'You won to kee me? You won to kee me?

Christmas clothes

Christmas hair

Christmas shoe, this and that'

I just say make I weed the grass wey dey disturb me for backyard before e give my children cough

Na so I hear 'Mummy D na so you worry your husband this Christmas?'

Heyyyyyyyyy, I smile in understanding come tell am say 'Sir God provides'

Abeg no tension anybody oh

If you no fit buy cow, buy goat

You no fit buy goat, buy fawo

If fawo too cost nkor? Fish still dey

Na our Lord and Saviour get the birthday no be you

In less than two weeks school fees and house rent go show

Package yourself make you no go dey ask for urgent 2k by 38th January.

Sipping my garri with chilled water and milk😋😋😋😋